Në vend të hyrjes

Libri i poetit Sevet Dauti Fterrë, zemra ime

 

                         Vëllimi me poezi popullore që po paraqesim , është  përpjekja e parë e vjershëtorit fteriot Servet Dauti  për të dalë para lexuesve me një libër të plotë, ku janë përmbledhur një pjesë e krijimeve të tij të shkruara në vite. Disa nga vjershat janë botuar edhe në gazetën Fterra jonë e në simotrat e saj të fshatrave fqinjë.

                          Në këto vjersha të bie në sy dashuria e pakufishme që ka autori për vendlindjen, për Fterrën tonë të dashur, të cilës i kushton disa poezi radhazi. Gjithashtu, autori nuk harron vitet e vështira të fëmijërisë, shokët e tij  të vegjëlisë, vendet e bukura të fshatit, stanet e çobanëve, ujët e ftohtë të Ixorit, e të tjera, e të tjera.

                           Vend të veçantë zenë poezitë për traditat, për luftëtarët e krahinës e të fshatit, për hisorinë e arsimit e të kulturës, për mikëpritjen e bujarinë e Fterrës dhe për njerëz të shquar të saj.

                            Bukurinë e freskinë këtij vëllimi ia shtojnë këngët  e dashurisë, të cilat mendoj se janë nga më të bukurat dhe lexohen me shmë dëshirë. Kjo tregon edhe faktin se autori, edhe pse tani është pensionist, ka patur e ka ndjenja të holla, që i derdh me mjeshtërinë e  poetit popullor në vargje, që do të mbeten të pashlyera në kujtesën e lexuesit.

                           Autori, edhe pse shumicën dërmuese të poezive i ka shkruar për Fterrën e fterjotët, nuk ka patur dhe nuk mund të kishte për qëllim që të zgjidhte fugurat kryesore të fshatit. Ai ka shkruar i frymëzuar nga ndjenjat e dëshirat e çastit, ka përfshirë në vjersha moshatarët, çobanët, vjershëtorët e të tjerë. Nuk duhet të zemërohen as ata, për të cilët Serveti ka thurur vjersha shoqërore e humoristike, të cilat, siç dihet, kanë qenë në traditën e bukur të bejtexhinjve fteriotë.

                           Në redaktimin e këtij vëllimi, jam munduar që gjithçka të bjerë era Fterrë, duke ruajtur stilin e vargjet e shkruara nga Serveti, duke lënë edhe fjalë e shprehje që përdoren në fshat, duke sakrifikuar ndonjëherë dhe ortografinë, për hir të vargut e të rrimës. Këto , shpresoj, do të kuptohen drejtë e jo si mungesë  serioziteti.

                          I urojmë Srvetit suksese të mëtejshme dhe jam i bindur se në të ardhmen do të kemi prej tij edhe botime të tjera.

 

                                                                                   Bardhyl  Xhama

                                                                                       -Shkrimtar-