DO TI KËNDOJ TRIMËRISË

Do ti këndoj Kurveleshit,

do ti këndoj trimërisë,

se ai shpatën e zhveshi,

në rrjedhat e historisë.

U ngrite përmbi osmanë,

i veshur me fustanellë,

në brez ngjeshur jataganë,

shqipëtari sduron zgjedhë.

Kurvelesh, male dhe gryka,

ku ndërton folen shqiponja,

kudo istikame, prita,

gjaku ka rrjedhur buronja.

Sipër Kuçit, mal i Shkagës,

ishte kala e Gjolekës,

atje trimat lidhnin plagët,

i digjnin me zjarr të eshkës.

Nxorre trima kapedanë,

Zenel Gjolekë kuçiotin,

Hodon e Çelo Picarë,

Lazo Kofinë fterjotin.

Dhe në luftën çlirimtare,

për lirinë e Shqipërisë,

o Kurveleshi me halle,

me gjak shkrove historinë.

Dhe Evropa e bashkuar,

lart ta çmoi trimërinë,

Kurveleshi ka luftuar,

Kuçin e shpalli martir.

Por ka ende bukëshkalë,

që dhe luftën e mohojnë,

mos ti lëm të hedhin baltë,

historinë ta errësojnë.

Se historia është gjallë,

me gërma të arta shkruar,

ka çarë në shekuj me pallë,

jo, kurrë nuk duhet mohuar!